Koktebel Jazz Party халкъара джаз фестивали вакъиа туризм саасы боюнджа «Russian open Event Expo» адлы IV Умумрусие ярышынынъ «Медениет» номинациясында биринджи ерге чыкъты. Конкурснынъ финалы ноябрьнинъ 11-13 куньлери Ханты-Мансийск шеэринде кечти.
Фестивальнинъ тешкилий комитет векили Михаил Кириллов къоджаман джаз фестивалининъ тешкиль этилюви, махсус тедбирлер, эм де Koktebel Jazz Partyнинъ иштиракчилери — дюньяджа белли чалгъыджылар акъкъында, фестивальнинъ ичтимаий месулиетлиги, промокампания хусусиетлери ве журналистлернен алып барылгъан иш акъкъында икяе этти. 2016 сене фестивальни 7 мемлекеттен кутлевий малюмат васталарнынъ 100-ден зияде векили айдынлатты.
Вакъиа туризми ярышынынъ черчивесинде 52 региондан 205 лейха кечти. Олардан Къырым иштиракчилери 6 лейха иле чыкъышта булундылар.
Вакъиа туризмининъ Умумрусие ярышы «Russian open Event Expo» серлевалы V Умумрусие ачыкъ ярмалыкъ черчивесинде тешкиль олунды. Бир къач куньге «Югра-Экспо» серги меркези микро-шеэрге чевирильди, онынъ сакинлери Русие регионларынынъ туристик лейхаларыны такъдим эттилер. Ярмарлыкъ иле параллель шекильде мейданда мастер-класслар, викториналар ве тёгерек масалар кечти.
Вакъиа туризм саасы боюнджа Умумрусие ярышы докъу номинацияда кечти. Эсас ярыш программа иле бирге даа эки мустакъиль ярыш олып кечти: беледие тешкилятлар ичюн «Вакъиа туризмининъ пайтахты» ве Русие субъектлери ичюн «Вакъиа туризмининъ лидери».