Эдди Пальмиери: Koktebel Jazz Partyде сейирджилер севгиси мукяфатыны къазанмакъ мен ичюн буюк шереф олур

Эдди Пальмиери: Koktebel Jazz Partyде сейирджилер севгиси мукяфатыны къазанмакъ мен ичюн буюк шереф олур

Koktebel Jazz Partyде Eddie Palmieri Latin Jazz Band коллективи иле чыкъышта булугъан  белли джаз чалгъыджысы Эдди Пальмиери фестивальнинъ сейирджилер севигиси мукяфатыны къазанып оладжагъында эмин. Бу мукяфат эр фестиваль кунюнинъ онъунда бериле, гъалиплерни шамата ольчеген алетлер иле бельгилейлер, олар сейирджилер алгъышларынынъ сесини ольчейлер. 

Пальмиери айырыджа къайд этти ки, онынъ топламында чешит мукяфатлар чокъ олгъанына бакъмадан, Къырым фестивалининъ мукяфаты онынъ ичюн буюк шереф олур.  

«Меним 10 Грэмми мукяфатым бар. Ве мен ичюн бойле мукяфат- сейирджилер севгиси мукяфатыны эльде этмек  энъ буюк шереф олур. Чюнки Къырымны биз пек бегендик. Биз мында чыкъышта булунгъанымызгъа буюк эмиет беремиз, биз бу ерге севда олдыкъ, мында тамам Къара денъиз янында сана бар. Мен ичюн сейирджилер севгиси мукяфаты пек муим мукяфат оладжакъ — ве мен оны къазанаджагъымда эминим», — деди Эдди Пальмиери.

Матбуат-конференцияда чыкъышта булунаракъ чалгъыджы мейданда сеснинъ юксек кейфиетини ве санадан ачылгъан манзаранынъ аджайиплигини айырыджа къайд этти.  

«Сес де пек гузель, муэндислер де пек яхшы чалышалар, ве санадан ачылгъан манзара — о садедже мухтешем. Биз мында булунмагъа имкянымыз олгъанындан пек частлымыз», — деп теэссюратларнен пайлашты Пальмиери.

Журналистлернинъ суаллерине джевап беререк, Пальмиери русиели музыкада севген шейлери акъта тариф этти. Озь севимли бестекярлары арасында Пальмиери Римский-Корсаковны, Мусоргскийни ве Стравинскийни сечти. О, эм де земаневий русиели бас-гитараджы Борис Козловны къайд этти, олар сыкъ алда ишбирлик эте экенлер.